Како да му помогнете на вашето бебе да спие подобро?

Сонот е еден од најважните фактори за здравиот развој на вашето бебе. Сепак, многу родители се соочуваат со предизвици кога станува збор за воспоставување стабилна рутина на спиење. Во овој блог пост ќе ви откријам неколку корисни совети кои можат да ви помогнат да создадете мирна и безбедна атмосфера за спиење на вашето малечко.

1. Создадете рутина за спиење

Бебињата сакаат предвидливост. Доследна рутина пред спиење може значително да помогне во подготовката на вашето бебе за успивање. Обидете се секоја вечер да следите исти чекори, како на пример бањање, нежна масажа, читање приказна или пеење приспивна песна. Ова ќе му даде сигнал на вашето бебе дека е време за спиење.

2. Оптимална собна температура и темнина

Собата во која спие бебето треба да биде со пријатна температура, идеално меѓу 18-22°C. Исто така, важно е просторијата да биде затемнета, бидејќи темнината помага во лачењето на мелатонин – хормонот на спиењето. Ако вашето бебе има потреба од малку светлина, користете пригушена светлина од ноќна ламба со топла боја.

4. Разликување на ден и ноќ

Новороденчињата често имаат нарушен циркадијален ритам, но вие можете да им помогнете да научат кога е ден, а кога ноќ. Во текот на денот, изложете го вашето бебе на природна светлина, играјте и комуницирајте со него. Навечер, намалете ги светлата и избегнувајте гласни звуци за да создадете смирена атмосфера.

5. Не прескокнувајте дневни дремки

Понекогаш родителите мислат дека ако бебето спие помалку преку ден, ќе спие подобро навечер, но вистината е спротивна. Бебињата што се преморени имаат потешкотии со заспивањето и често се будат. Овозможете му доволно дневни дремки за да избегнете премор.

6. Научете да препознаете знаци на замор

Бебињата испраќаат сигнали кога се уморни, како триење на очите, зевање, губење интерес за околината или раздразливост. Доколку овие знаци се игнорираат, бебето може да стане преморено, што ќе го отежни заспивањето.

7. Учете го вашето бебе на самостојно заспивање

Самостојното заспивање е вештина која се учи. Наместо да го навикнувате бебето на постојано нишање или доење за да заспие, обидете се постепено да ја намалувате вашата улога во процесот на заспивање. Користете нежен пристап, каде што ќе бидете присутни за поддршка, но ќе му овозможите на бебето да се смири само. Доколку се буди во текот на ноќта, обидете се да ги користите истите техники на смирување кои ги применувате при заспивање, за да му помогнете да научи како повторно да заспие самостојно. Разгледајте ги нашите програми, кои ќе ви помогнат во целиот процес.

8. Бидете трпеливи и доследни

Секоја промена во навиките за спиење бара време. Бидете трпеливи и доследни во вашите методи. Ако една вечер не оди според планот, обидете се повторно следниот ден.

Ако и покрај овие совети сè уште имате тешкотии со спиењето на вашето бебе, не двоумете се да побарате стручна помош.

Споделете го овој пост со вашите пријатели, помогнете да го вратиме сонот во што е можно повеќе фамилии. Имајте слатки и проспани ноќи!
 
Вашиот Dr.Goodnight